Antiphanes Comicus / Fragmentum 191

Antiph. Fr. 191 -404 / -330

tradução / grego antigo

Versos em dialeto ático. Texto de acordo com a edição de Kock (1884).

ΠΟΙΗΣΙΣ

μακάριόν ἐστιν ἡ τραγῳδία ποίημα κατὰ πάντ', εἴ γε πρῶτον οἱ λόγοι ὑπὸ τῶν θεατῶν εἰσιν ἐγνωρισμένοι, πρὶν καί τιν' εἰπεῖν· ὥσθ' ὑπομνῆσαι μόνον δεῖ τὸν ποιητήν· Οἰδίπουν γὰρ ἂν μόνον φῶ, τἄλλα πάντ' ἴσασιν· ὁ πατὴρ Λάιος, μήτηρ Ἰοκάστη, θυγατέρες, παῖδες τίνες, τί πείσεθ' οὗτος, τί πεποίηκεν. ἂν πάλιν εἴπηι τις Ἀλκμέωνα, καὶ τὰ παιδία πάντ' εὐθὺς εἴρηχ', ὅτι μανεὶς ἀπέκτονεν τὴν μητέρ', ἀγανακτῶν δ' Ἄδραστος εὐθέως ἥξει πάλιν τ' ἄπεισι . . . . . ἔπειθ' ὅταν μηδὲν δύνωντ' εἰπεῖν ἔτι, κομιδῇ δ' ἀπειρήκωσιν ἐν τοῖς δράμασιν, αἴρουσιν ὥσπερ δάκτυλον τὴν μηχανήν, καὶ τοῖς θεωμένοισιν ἀποχρώντως ἔχει. ἡμῖν δὲ ταῦτ' οὐκ ἔστιν, ἀλλὰ πάντα δεῖ εὑρεῖν, ὀνόματα καινά, τὰ διωικημένα πρότερον, τὰ νῦν παρόντα, τὴν καταστροφήν, τὴν εἰσβολήν. ἂν ἕν τι τούτων παραλίπηι Χρέμης τις ἢ Φείδων τις, ἐκσυρίττεται· Πηλεῖ δὲ ταῦτ' ἔξεστι καὶ Τεύκρωι ποιεῖν.